Прадстаўнікі беларускага палка Каліноўскага, які змагаецца ва Ўкраіне супраць расійскай агрэсіі, выпусцілі свой навагодні зварот да беларусаў, якія знаходзяцца ўнутры краіны і за яе межамі.
«Шаноўныя беларусы і беларускі. Усе тыя, хто разам з намі змагаецца супраць расійскай агрэсіі ва Украіне і ўсе, хто на выгнанні з нашай роднай Беларусі. Усе, каго лёс занёс у розныя куткі свету, і ўсе, хто працягвае жыць пад прыгнётам дыктатуры. Усе, хто ў поўнай меры адчувае яе катаванні, а таксама ўсе, хто да гэтага часу не заўважае гэтай самай дыктатуры ці робіць такі выгляд. Усе тыя, хто пакуль яшчэ яе падтрымлівае, усе, хто каля станка, пакуль што ў пагонах, усе, хто вучыць, лечыць, займаецца бізнэсам і спортам і працягвае займацца мастацтвам у гэты нялёгкі час.
Беларусы. Падыходзіць да заканчэння 2022 год. У гэтым годзе мы стварылі беларускі полк імя Кастуся Каліноўскага, які стаў побач з украінцамі ў вайне супраць расійскай агрэсіі і паставіў сабе мэту — вызваленне Беларусі праз вызваленне Украіны. Гэта быў год барацьбы, развіцця і сапраўдных выпрабаванняў. Мы ўдасканальвалі свае навыкі і выконвалі баявыя заданні у найгарачэйшых кропках фронту. Нас станавілася і становіцца ўсё больш і больш. На вялікі жаль, мы таксама страчваем нашых пабрацімаў, чые імёны назаўсёды застануцца ў нашай памяці і ў памяці ўсяго беларускага народу.
Наперадзе наш народ чакае яшчэ адзін год змагання. Год, у якім трэба выстаяць. Дзеля тых, хто загінуў. Хто зараз у турме і несправядліва пакутуе. Дзеля тых, кто рабіў гісторыю ўчора і робіць яе сёння. Бо мы — новая кагорта беларусаў, якія змагаюцца за сваю нацыю і за ганаровае імя нашчадкаў полацкіх дружыннікаў, рыцараў Вялікага княства Літоўскага, ваяроў Каліноўскага, начшадкаў БНР. Сэрцы ўсіх нашых людзей найбольш жадаюць перамогі над акупантамі і іх прыхвастнямі ў Беларусі, і мы зробім усё магчымае дзеля гэтага.
Беларускі полк імя Каліноўскага абяцае і далей стаяць на абароне Украіны, а таксама прыкласці максімум сілаў, каб мэта нашага народу здзейснілася і Беларусь стала свабоднай у новым годзе, а дзяржава была для народу, адпаведна заветам Кастуся Каліноўскага».